[Date Prev][Date Next][Thread Prev][Thread Next][Date Index][Thread Index]

No Subject



le lisri be le serti

                              .i  fitfi'i di'e ro lei ba cusku be ledu'u
                              vo'e vo'i na srana

ni'oni'o tu'e

     lu  do mo  li'u preti fi la pacrux. goi fo'a
     .i lu  mi to'erno'i ji'u leka cerda  .ije ro le pidrai mi bruna
.i .oicai ge le terdi cu to'e melbi gi le remna cu to'e gleki  li'u
     .i di'u se bacru lo citno nanmu noi se lafti se mebri gi'e denmi
se xance  .i ri goi ko'a sanli crane le serti  .i labyxu'e linji ke
blabi roimrmaro ke galtu serti  .i ko'a catlu fa'a le darno bedi'o
lepu'u le grusi kalsygri be leka prenu pindi cu ca simsa be loi ctaru rirxe
ke to'ekli boxna ku savri'a  .i diklo slilu gi'e febvi fengu gi'e lafti
loi to'e plana ke xekri birka  .i le nunpante ke suksa sance .e lei
fengu nunki'a cu desku le vacri  .i le te minra cu simsa be lo darno ke
barda terdanti sance ku masno je junri runta  .i lei girzu cu banro gi'e
klama ne'i loi pelxu pulce dilnu  .ije loi sepli ti'otra cu mutcne leka
viskli ze'o le kampu ke grusi vanbi
     ni'o lo.o'enai slabu cu simsa be lepu'u sisku leri se cirko ka
citno be'o ni'akro befa'a le terdi ku dzukla  .i lo cucycau cmaxli cu
jgari lera selxaksu taxfu gi'e catlu le galtu serti sepi'o lo tinbe je
simsa be le rulnkentaure,a bei leka blanu ku kanla  .i catlu je cisma
.i loi selpopseltau je grusi je cinla remtra cu trixe dzukla gi'e gunma
sanga lo selsno ke mrori'i zgike  .i da kercrori'a siclu fi le ctebi
.i de noi daski nenri se xance cu cmila sepi'o lo cladu je rufsu voksa
.ije lede kanla cu jarco leka fenki
     ni'o lu  mi to'erno'i ji'u leka cerda  .ije ro le pidrai mi bruna
.i .oicai ge le terdi cu to'e melbi gi le remna cu to'e gleki  .i .iunai
vu gapru  .i .o'onai  li'u
     .i di'u se bacru lo citno nanmu noi se lafti se mebri gi'e dukri'a
denmi se xance
     .i lu  .io xupe'i do xebni lei vu gapru  li'u preti fi fo'a noi ca
tcica krori'a le xadni fa'a ko'a
     .i lu  .aisai mi ba vefsfa lei vu mabla nobli joi turni  .i mi ri
kusru vefsfa seka'i leimi bruna goi ko'u noi simsa be le canre bei leka
pelxu ku se flira zi'e noi zmadu be le la gaimast. si'erbi'e bei leni
tepri'a ku se cmoni  .i ko viska leko'u lunbe ke ciblu ve flecu xadni
.i ko tirna leko'u cmoni  .i .ai mi ko'u venfu  .i le'o ko curmi  li'u
     .i fo'a cisma
     .i lu  mi jibri bandu lei vu gapru  .ije mi se le'irbai gi'anai
lacti'a ri  li'u
     .i lu  mi ponse no solji  .i mi ponse no lo se pleji befi do  .i
mi pindi je selpopseltau citno  .iku'i mi bredi lenu pleji lemi kazyji'e
li'u
     .i fo'a rapli cisma
     .i lu  .e'onai ri zmadu lemi se cpadji  .i do'anai ko fi mi dunda
leka do sanga'e  li'u
     .i lu  .ueru'e leka mi sanga'e  .i .iefi'i  .i .e'i mi noroi tirna
di  .i .e'i po'osa'a  li'u
     .i lu  do ranji leka ka'e tirna  li'u  .i fo'a ko'a papri'a sepi'o
di'u gi'e cadzu curmi  .i lu  ko pagre  li'u
     .i ko'a bikla bajra gi'e dzugre ci te serti tai panu stapa  .i ku'i
lefo'a terkre xance ko'a lacpu
     .i lu  banzu  .i ko sisti mu'i lenu tirna leiko'u vu cnita cmoni
li'u
     .i ko'a sisti gi'e kerlo jundi
     .i lu  .uesai  .i ki'uma ko'u suksa cfari lenu to'edri sanga gi'e
xalbo cmila  li'u  .i ko'a krefu ke bikla bajra
     .i fo'a ko'a krefu rinju
     .i lu  mu'i lenu do krefu pagre ci te serti kei mi cpadji ledo
kanla  li'u
     .i ko'a pa'arcau sliri'a le xance
     .i lu  ku'i va'o la'edi'u mi na ka'e viska ga leimi bruna gi leimi
ba se vefsfa  li'u
     .i lu  do ranji leka ka'e viska  .i mi fi do ba dunda lo drata
kanla noi mutce zmadu li'u
     .i ko'a rapli pagre ci te serti gi'e ni'a catlu jundi  .i fo'a
rinka lenu ko'a morji
     .i lu  ko viska leko'u lunbe ke ciblu ve flecu xadni  li'u
     .i lu  .uecai  .i .u'ecai cizra  .i cama binxo lenu ko'u melbi
dasni  .i ji'a seba'i lei ciblu te xrani ko'u se jadni loi se manci
xunre rozgu  li'u
     ni'o vi ro lo cimoi te serti fo'a di'i lebna lefo'a cmalu selpleji
.i ku'i ko'a ru'i cadzu  .i ko'a bredi dunda rodi mu'i lemu'e klama tu
gi'e vefsfa leivu malplana nobli joi turni  .i .uo.ui semaunai pa te
serti  .i ba su'epa te serti ko'a gapru  .i ko'a cabazi venfu leiko'a
bruna
     .i lu  mi to'erno'i ji'u leka cerda  .ije ro le pidrai sa'a li'u
     .i lu  ju'i. citno nanmu su'epa te serti  .i ba su'epa te serti do
venfu  .i ku'i levi te serti di'i ve pleji le relpi'i jdima mi  .i ko
fi mi dunda leka do cinmo je morji  li'u
     .i ko'a sliri'a le xance
     .i lu  .ii leka cinmo  .i .e'anaicai  .i dukse kusru  li'u
     .i fo'a maljgira cmila ra'i le galxe
     .i lu  mi na mela'edi'u kusru  .i mi fi do canja dunda lo zabna
kazyci'o .e lo cnino kazmo'i  .i ga do zanru gi do noroi pagre levi te
serti gi'e noroi venfu leido bruna pe lo se flira be le simsa be le
canre zi'e pe le se cmoni be le zmadu be le la gaimast. si'erbi'e bei
leni terpi'a  li'u
     .i ko'a catlu lefo'a crino je ranxi kanla
     .i lu  ku'i mi traji leni to'e gleki  .i do lebna ro ckaji be le
kazre'a mi  li'u
     .i lu  to'e go'e  .i traji leni je'a gleki  .i .e'apei  .ixu do
tugni  .i do'anai leka do cinmo je morji  li'u
     .i ko'a cu trati pensi  .i lo xekri ctino cu manri'a leko'a flira
.i loi xasne ke to'ekli dirgo cu gunro zo'a le se cinje mebri  .i ko'a
fengu demri'a le xance gi'e bacru pa'o le denci
     lu  .ai.e'asai  .i ko lebna  li'u
     ni'o ca lenu le xekri kerfa ca biflu'a kei ko'a simsa be le crisa
lidbi'e ku fengu pagre le romoi te serti  .i ko'a capu snada lemu'e
gapru  .i suksa cisma gusni leko'a flira  .i leko'a kanla cu dirce
seci'o le smaji ka se mansa  .i leko'a xance cu luzbi'o  .i ko'a catlu
lei pixsalci nobli  .i catlu le cnita bedi'o lenu krixa je dapma fa le
grusi je selpopseltau girzu  .i catlu  .i ku'i no sluji be leko'a flira
cu frati  .i ri selgu'i je gleki je selpu'a  .i ko'a viska lo salci se
taxfu girzu vi le cnita  .i lei pu cmoni ca salpemci
     .i lu  do mo  li'u tcica preti fi fo'a sepi'o lo rufsu voksa
     .i lu  mi nobli ji'u leka cerda  .ije lei cevni mi bruna  .i .uicai
ge le terdi cu je'a melbi gi le remna cu je'a gleki  li'u

tu'u
     .i di'u se finti la xristoz. smirnensk. gi'e se fanva la .iVAN.
     derJANSK. fo le banblgaria si'u la nitcion. nikolas.
fa'o
---- --- -- -  Long Live the Rose and the Heather!  - -- --- ----
Ivan A Derzhanski   (iad@cogsci.ed.ac.uk;  iad@chaos.cs.brandeis.edu)
* Centre for Cognitive Science,  2 Buccleuch Place,  Edinburgh EH8 9LW,  UK
* Cowan House, Pollock Halls, 18 Holyrood Park Road, Edinburgh EH16 5BD, UK